|
Monday, 14 January 2008 |
 E ta manera un cancer cu no kier bai laga nos!
E tumba di Roderick Franken ariba diasabra anochi tawata un mensahe cla y raspa, ban uni! Un tumba cu su letra ta mustra riba e hecho mas grandi cu ta tene nos como yui di tera di no por progresa manera mester ta!
Pero awe dialuna topico di dia ta e resultado di Tumba. A cuminsa na Canal 90 durante e programa di Ivo Yanez unda ta trece dilanti cu den hurado tawata sinta un famia di banda Prive! A bin resulta cu ta un corista su ruman tawata den e posicion di hurado, cual corista a yuda OREO tambe.
Tur e conmovecion aki ta cuminsa pa motibo cu Guillfred Besaril su tumba "Caya Ta Warda" no a a cai den premiacion, ta di e seno aki e critica ta sali.
Ki dia sinceramente nos ta sinja respeta resultado di hurado? Ta jega e momento cu ningun persona no lo ta willing pa para hurado mas pa motibo cu ta critica e persona su intigridad. Hasta a bai asina leu cu a menciona cu lo bai busca hurado na Curacao.
Ki dia nos ta sinja respeta nos mesun hendenan, respeta resultado! Anja pasa caba nos di Aruba-Zone.com a trece esaki bon dilanti.
E competencia no ta tur cos, ora e competencia caba mester por trece e ambiente ariba cayanan di Aruba pa Carnavalistanan.
Den Calypso & Roadmarch Contest tin un differente problema, ora bo bin cu un Roadmarch cu contenido, cu letranan fuerte bo no ta gana pa motibo cu e roadmarch mester ta un cantica cu mester por move e Carnavalistanan riba caya, nos pregunta ta keda, segun ken? Cu e cantica "Caya Ta Warda" ta un bon cantica pa caminda ta un hecho, pero e realidad di bida ta cu ariba e anochi di diasabra dilanti un publico para scuchando e letranan, e tawata bisto cu tawatin un ganador!
Pa nos di Aruba-Zone.com e ta bon cla, Roderick Franken y su tumba "Ban Uni" ta ganador absoluto di diasabra anochi! Respeta e desicion di hurado y duna honor na banda Prive, un banda hopi hoben, guia pa un legendario di Tumba di Aruba, Danny Koolman a sa di a trece un bunita presentacion y merecidamente ta bai cu e premio maximo.
Cu no tin confiansa den dirigentenan, den e organizacion, den hurado, e ta hopi facil participantenan, bandanan boso uni, al fin di dia cu bosonan cu ta stima tumba mester uni pa asina Tumba por crece atrobe. Pero tanten cu ta exsisti e divishon aki, niun hende lo no keda satisfecho.
E mensahe ta keda cla y raspa y e ta conta no solamente pa Tumba contest, e mensahe ta conta pa tur arubiano biba na Aruba: Aruba, Ban Uni!
Editor Aruba-Zone.com
email:
This e-mail address is being protected from spam bots, you need JavaScript enabled to view it
|
